As obras editadas pola editora disponibilizam-se na internet sob licença Cretive Commons

PGL - A Estaleiro Editora inaugurou recentemente a sua colecçom de teatro. Esta circunstância motivou umha apresentaçom pública na passada sexta-feira, dia 27 de Junho, na biblioteca Ângelo Casal de Compostela, das obras com as quais a editora se estreia no género, Insomnio, de Rubén Ruibal; e Fume, do próprio Ruibal e Carlos Losada. Com esta aposta no teatro, a Estaleiro Editora quer «explorar novas vias de difusom» para o género no nosso país, «habitualmente desatendido e minorizado no sistema editorial galego», explica.
[...]

Deste jeito, a editora quer também aprofundar na sua configuraçom como alternativa ao circuito oficial da literatura e do pensamento subsidiados «de que tanto vem dependendo o teatro galego».

As duas obras anteriormente mencionadas, Insomnio e Fume, igual que as já editadas e as que vinherem, podem descarregar-se de graça desde o portal da editora mercê a que disponibilizam com licença Creative Commons. Como é natural, as mesmas obras também se podem conseguir na ediçom tradicional em papel, neste caso por apenas seis euros.

Iniciativa sem ânimo de lucro

No seu web, a Estaleiro Editora apresenta-se com umha «associaçom cultural sem ânimo de lucro» que se rege por assembleia com o propósito de desenvolver um projecto de ediçom independente, capaz de abrir novos caminhos dentro do sistema literário galego.

Pretende ser referente e alternativa ao circuito oficial da literatura na Galiza, para o qual se constitui como um «projecto de difusom cultural» que opta polas vias de distribuiçom alternativa, rejeita a política dos subsídios e pretende uma ediçom de qualidade a preços reduzidos, cujo mínimo lucro esteja destinado unicamente à produçom de novos materiais e à promoçom e distribuiçom dos já publicados.

Por este motivo, a Estaleiro edita sob licenças Creative Commons, permitindo e ainda fomentando a possível reutilizaçom das suas publicações, só exigindo ser informada da ediçom dos novos materiais, que esta se faga sob o mesmo tipo de licença, citando a ediçom original e também sem ânimo de lucro.

+ Mais informaçom:

• Sítio web da Estaleiro Editora
• Texto de apresentaçom da editora
• Catálogo de obras publicadas [disponíveis para descarga em formato PDF]
• Listagem oficial de licenças Creative Commons
• No ficheiro PDF que acompanha esta nota podem consultar os perfis biográficos de Rubén Ruibal e Carlos Losada