Erro
  • Erro ao carregar dados do sinal web.

Associaçom Galega da Língua

Júri do certame Pérez Parallé adere à campanha ‘Galego em Liberdade’

A resoluçom do júri do certame poético Pérez Parallé, que ganhou o catalám Eduard del Castillo, apoia a campanha Galego em Liberdade, iniciada pola AGAL na passada semana e que já reuniu mais de 540 assinaturas.

Em concreto, a ata deste prestigiado prémio poético «recusa a censura normativa» pola qual venhem sendo «vitimados» galegos e galegas que vivem a sua língua como «sendo comum com a doutras sociedades», em clara referência ao resto da Lusofonia. Ademais, defende esta posiçom integradora «em coerência com a tradiçom e história do galeguismo».

Ainda, na linha da própria campanha da AGAL, o júri do Pérez Parallé afirma que no caso dos prémios literários deve prevalecer «a qualidade artística das propostas». Finalmente, sugerem à organizaçom deste certame e de quantos outros se convocarem no País que incorporem nas suas bases a nom discriminaçom por razom «de norma ou de modelo lingüístico», para desta maneira contribuir «a que as atitudes censoras fiquem como umha relíquia do passado».

+ Para mais informaçom:

 
 

Otimismo e força na festa de boas-vindas à AGAL 2014

Há já vários anos que a AGAL organiza umha pequena festa —quer em formato jantar, quer ceia ou petiscos— para receber e dar as boas-vindas às pessoas que entram na associaçom. É complicado saber se existem muitas associações no nosso país, ou noutros, que tenham este costume assente. Para o presidente agálico, Miguel Penas, «dá para desconfiar que, por desgraça, sejam bem poucos os casos deste tipo de eventos». Na sua opiniom, «é umha mágoa», porque «nada pode substituir o contato humano e direto», nada pode «substituir a proximidade ou umha conversa olhando, ao vivo, às pessoas interlocutoras».

Do Conselho da AGAL agradecem às «amigas e amigos» que acompanhárom este e outros convívios, também «àquelas novas sócias e sócios e a quem já nom é tam recente», pois é graças ao seu apoio que a associaçom pode continuar. «Já avançámos muito, e graças a vós podemos construir os alicerces para termos umha estrutura que cada dia poda ser mais sólida e eficaz. Em definitiva, construir umha AGAL mais útil», explica Penas.

Para perceber a qualidade humana deste alargamento da base social agálica, só é preciso dar umha vista de olhos às entrevistas da série AGAL-Hoje, diálogos nos quais observamos o variado perfil das pessoas que contribuem «a aumentarmos a nossa mais grande riqueza» —afirma Penas—, mas que também mostram onde é que está «o nosso maior potencial: a sua generosidade», sentencia o presidente da AGAL.

No passado sábado, dia 8, foi possível, mais umha vez, sentir essa força e entusiasmo. Em Vidám, nas redondezas de Santiago de Compostela, amigas e amigos —também na língua— que se juntavam para desfrutar do galego percebido como português; sentido-se mais felizes, mais alegres e mais dignos, conseguindo agir como galegas e galegos plenamente. Otimismo e vontade de avançar com firmeza, transmitindo esta maneira de viver a nossa língua. Assim som as festas de bem-vinda à AGAL.

O presidente, Miguel R. Penas, dá a bem-vinda ao jantar Panorâmica da mesa Novamente o 'prési', agora explicando a estrutura da AGAL Aurora, respondendo as perguntas 'surpresa' Susana, manifestando-se Na foto, a vez de Táti Já agora, fala o Alfredo Um dos veteranos: Gerardo Mais um veterano, o Manuel Mais um picheleiro, Ugio desde Sam Lázaro Eduardo gravando Ugio Paulo também se 'explicou' Lola colocou um ponto de perspetiva Ao longe, Iván falando Sabela e Pichel com trabalhos paralelos Xián, respondendo as perguntas Xián, oferecendo lotaria da Semente-Vigo Encerrou o evento a sócia mais jovem, Aloia

 
 

‘O pequeno é grande’, de Xoán Carlos Carreira e Emilio Carral

O pequeno é grande. A agricultura familiar como alternativa: O caso galego é a mais recente novidade da Através Editora, disponível já para assinantes do Através Clube.

Nesta obra, Xoán Carlos Carreira e Emilio Carral analisam a importância da agricultura em pequena escala. Umha combinaçom de revisões bibliográficas, investigações e conclusões próprias dos autores, hipóteses e ideias prospetivas, que tenciona apresentar um conjunto de ideias e propostas para incentivar um debate necessário na nova fase que deverá começar para a agricultura galega.

É este um ensaio que aspira, portanto, a ser um ponto de partida, nom de chegada. Os professores Carreira e Carral procuram respostas para as perguntas chave: Quem habita hoje o meio rural? Quais som os diferentes tipos de explorações agrárias galegas na atualidade? Qual é o papel da agricultura em pequena escala? No século XXI, o minifúndio continua a ser um problema para o desenvolvimento agrário da Galiza ou, de alguma maneira, é umha agricultura de precisom, feita, isso sim, com base num enorme esforço? Até que ponto som certas as ideias em que se funda a consideraçom das pequenas explorações labregas familiares como marginais? Até que ponto podem ter um papel importante no novo paradigma da agricultura entendida nom só como produtora de alimentos mas também como fornecedora de serviços à sociedade?

Xoán Carlos Carreira Pérez

Lugo, 1956. Doutor engenheiro agrónomo, professor de Engenharia Agroflorestal na Universidade de Santiago de Compostela. Foi vice-reitor de Infraestruturas, diretor da Escola Politécnica Superior de Lugo e da E.U. de Engenharia T. Florestal. Tivo diversos cargos de responsabilidade em organizações políticas e sindicais nacionalistas. Em 1975 integrou-se nos CALL, sendo um dos seus primeiros membros e um dos impulsores do Sindicato Labrego Galego-Comisións Labregas. Autor de vários livros e artigos científicos, colaborou em diversos meios de comunicaçom, como A Nosa Terra, El Progreso, Vieiros e Praza Pública.

Emilio V. Carral Vilariño

Santa Marinha do Castro de Amarante (Antas de Ulha), 1962. Doutor em Ciências Biológicas, professor da Área de Ecologia na Universidade de Santiago de Compostela. Foi subdiretor e diretor (em funções) da Escola Politécnica Superior e coordena o IV Ciclo Universitário no Campus de Lugo. Realizou estadias em centros estrangeiros (Cuba e Holanda). Tem publicado numerosos artigos científicos e de divulgaçom sobre resíduos agroindustriais, poluiçom, metais pesados, nutrientes, controlo ambiental, bioindicaçom, espécies protegidas, gestom ambiental e biodiversidade.

Para membros do Através Clube

As pessoas que formam parte do Através Clube poderám aquirir esta obra com 20% de desconto até 16 de novembro. Quem ainda nom for sócio ou sócia, deverá preencher o formulário do final desta página.

 
   

PGL.gal: iniciamos nova etapa!

A partir de hoje, o novo endereço do PGL é www.pgl.gal. Mais informações, aqui.

 
 

O PGL ficará uns dias sem atualizar para iniciar nova etapa

PGL - Conforme informado nas últimas assembleias da AGAL, o Portal Galego da Língua está já prestes a iniciar umha nova etapa. O 17 de Maio, Dia das Letras, o PGL fará doze anos de vida. Nessa mesma data o Portal iniciará nova etapa, com umha mudança de aparência e progressivas mudanças nas maneiras e tempos de atualizaçom.

Neste pequeno impasse, da equipa do PGL agradecemos antecipadamente a compreensom do nosso público.

 
   

Pág. 3 de 42

Actualidade da Língua no PGL