O passado 1 de Dezembro umha delegaçom do nosso Centro Social acudiu no concelho de Teio, à IV Assembleia Nacional de Nós-Unidade Popular. Lá participamos junto a cerca de 20 organizaçons políticas, juvenis, estudantis, colectivos sociais e associaçons culturais, além doutr@s companheir@s de diversos centros sociais vindos de distintos pontos do País, cumha saudaçom em nome d@s noss@s sóci@s.

Reproduzimos a seguir as palavras que o Antom Álvares, membro da gestora do Gomes Gaioso, pronunciou no acto de encerramento do máximo órgao de decissom da organizaçom independentista.

[Mais:]

DISCURSO DO C.S. GOMES GAIOSO NA IV ASSEMBLEIA NACIONAL DE NÓS-UNIDADE POPULAR

Companheiros e companheiras,
amigos e amigas de Nós-Unidade Popular:

O Gomes Gaioso começou a dar os seus primeiros passos semanas antes do 25 de Julho, quando um grupo de pessoas da Corunha e da sua comarca decidimos pôr em andamento um centro social em que se vissem identificadas todas aquelas pessoas da cidade enquadradas ideologicamente no soberanismo de esquerdas. Actualmente, Corunha carece deste espaço e, portanto, resulta imprescindível cobri-lo.

O Gomes Gaioso pretende ser um centro aglutinador e plural, mas nunca sem perder de vista o horizonte da libertaçom nacional, social e de género. Ainda nos resta muito trabalho por diante, porém o entusiasmo nom esmorece.

Procedendo de um centro que leva por nome Gomes Gaioso, um combatente galego assassinado polo fascismo espanhol, nom quigéramos deixar passar esta ocasiom sem parabenizar Nós-Unidade Popular por essa corajosa campanha nacional de eliminaçom da simbologia fascista.

Mais umha vez, tenhem de ser os sectores mais conscientes e combativos da sociedade galega os que dem exemplo a umhas instituiçons timoratas, que som incapaces de repararem a memória dos centos de miles de vítimas do fascismo espanhol.